Bi eta lau urte arteko espetxe zigorrak eskatzen dizkiete auziperatuei
Aitor Aspuru laudiarraren eta beste bost lagunen aurkako epaiketarekin datorren asteko ostiralean jarraitzea erabaki du Arabako Auzitegi Probintzialak. Fiskaliaren, abokatuen eta epailearen arteko bilera baten ostean hartu du erabakia auzitegiak. Gaur goizean ospatu da lehenengo bista.
Aitor Aspuru, Justo Arriola, Ekaitz Lotina, Imanol Madariaga, Pablo Remírez eta Julio Villanueva dira sei auziperatuak. Duela urte eta erdi AHTaren aurka Urbinan burututako manifestazio batean atxilotu zituzten. Manifestazioa bukatzerakoan, parte hartzaileetako batzuk Abiadura Handiko Trenaren obretan sartu ziren "desobedentzia ekintza baketsu" bat egiteko asmoarekin. Ertzaintzak kargatu eta hainbat pertsona atxilotu egin zituen orduan, tartean sei auziperatuak.
Desobedientziagatik multa bat ordaintzea eskatzen diote bati. Beste lauri desorden publikoak egozten dizkiete, kartzelarekin zigortu daitekeen delitua. Azkenari lau urteko kartzela zigorra ezarri nahi diote autoritateen aurkako atentatua egotzita. Aitor Aspururi bi urte eta sei hilabeteko kartzela zigorra eskatzen diote.
Prozesatuek adierazi dute euren erresistentzia "pasiboa" izan zela eta ertzaintza justifikaziorik gabe kargatu zuela. "Paradoxikoa da erasotzaileak salatzaileak izatea eta erasotuak akusatuen eserlekuan eseri behar izatea", salatu dute 6 lagunek.
Ertzaintzak Urbinan grabatutako bideo bat ikustatuko dute epaitegian urriaren 14an. Hortaz gain, akusatuek azken hitz izateko eskubidea izango dute.
Alkatearen elkartasuna
Natxo Urkixo Laudioko alkateak elkartasuna helarazi die sei prozesatuei prentsa ohar baten bidez.Urkixok adierazi du mota honetako "kriminalizazio saioak" beste garai zaharrago batzuei dagozkiela eta elkarbizitzari "ezer gutxi" ekartzen diela.
Ez da elkartasun keinu bakarra izan ordea; goizean dozenaka pertsona kontzentratu baitira auzitegiaren aurrean epaiketa salatzeko. Bestalde, 1599 autoinkulpazio lortu dira Ni ere Urbinan egon nintzen kanpainaren baitan.