“Eguraldi ona” eta “Laudio ondo komunikaturik egotea” izan dira arrakastaren gakorik nagusienak
Atzo Laudion ospatu zen Araba Euskaraz jaia azken urteetako arrakastatsuena izan da antolatzaileen arabera. Bi izan dira arrakasta horren gakoak jaialdiaren koordinatzailea den Angel Olalderen arabera.
Lehena atzo Laudion izandako “eguraldi ona” izango litzateke; ez delako, beste urte batzuetan bezala, “goiz euritsurik” egon. Bigarren faktorea Laudioren komunikazio ona izango litzateke, tren eta autobus zerbitzuek jende askoren etorrera ahalbidetu zutelako. Hortaz gain, Laudioren biztanle kopuruak ere eragina izan zuen, “parte hartzaile kupo minimo bat bermatu” zuelako.
Dena den, Olaldek azaldu du oraindik Trafikokoekin zein Renfeko arduradunekin hitz egin behar dutela zifra zehatzagoak izateko.
Gunerik arrakastatsuenak Parkekoa eta Eiakurikoa izan ziren. Parkeko zuhaitzen itzalak jende asko erakarrarazi zuen bertara eta Eiakuriraino ere “gazte asko” igo zen Txapelpunk, Ze esatek! edota Governors taldeen emanaldiak ikustera.
Gaur bertan hasi dira azpiegitura zein zabor guztiak jasotzen eta biharko gehiengoa jasota izatea espero dute, Olaldek adierazi duenez.