Udari ongietorria egiteko ugariak dira Aiaraldean antolatzen diren ospakizunak. Urduñako Gazte Asanbladakoek San Joan Bezperako sua egiten dute eta zenbait herritan ere antzeko ekintzak burutzen dira. Laudioko Larrazabal eta Landaluze auzoetan aldiz, jaia gehiago luzatzen da eta, hala, osteguneko erreketaz gain, ugariak izango dira bertako San Joan ermitaren inguruan antolatuko diren ekintzak, ospakizuna iganderarte luzatuz.
Ostegunean Kirikiño aisialdi taldeak antolatutako haur jolasen eta Buruhandien agerraldiaren ostean emango zaio sua zelaiaren erdian pilatutako egur mendixkari. Ondoren txokolatada egongo da eta Garraxi taldearen erromeriaz gozatzeko aukera ere bai.
Ostiral arratsaldean Bola Txapelketa ikusteko aukera egongo da eta gauean aldiz Herrikadak, Katxi de Pus (Skaltzainak) eta Goaz taldeek euren abestiekin alaituko dituzte auzoko bazterrak.
Larunbatean San Joan Astobitzako krosaren VI. edizioa burutuko da eta ondoren Itziarren semeak eta Triki ta ke taldeen kontzertuak egongo dira.
Baina iganderako ere ekintza anitz daude prestatuta. Goizeko bederatzietan mendi ibilaldiari hasiera emango zaio eta hamaiketan Otsoaren hatsa film laburra ikustatzeko aukera egongo da, Goikoganeko magaletan grabatutakoa.