Jaialdian Euskal Herriko hainbat lekutako taldeak herri-kirol norgehiagokan arituko dira
Ugariak izango dira hurrengo igandean Laudion ospatuko den Araba Euskarazean egingo diren ekintzak. Horien artean XIBA egitasmoak antolaturikoa dugu. Ikastolen Elkartearen baitan sortutako ekimen honek hainbat gazte bilduko ditu ekainaren 19an Laudion kirol norgehiagokan aritu daitezen. Lehiaketan Euskal Herriko hainbat zonaldetako taldeek hartuko dute parte. Antolatzaileek adierazi dutenez, “nahiz eta Ikastolen Elkartearen baitan antolatutako ekimena izan, edonork hartu dezake parte”. Hala, 16 urte baino gehiagoko gazteak 8-12 kide inguruko taldeetan biltzera eta izena ematera animatu nahi dituzte.
Parte hartzaileek hainbat herri kiroletan trebatzeko aukera izango dute: lasto fardelak eta harriak altxatuko dituzte, txingetan zein sokatiran arituko dira... Baina, horretaz gain, bestelako jokoak frogatzeko aukera izango dute, norgehiagokako froga guztiak ez direlako kirol tradizionalekin loturik egongo.
Aisialdi eredu berriak
Jada 8 urte igaro dira jaialdi honen lehen edizioa ospatu zenetik. Baina antolatzaileen arabera helburuek berdinak izaten jarraitzen dute. Herri kiroletan oinarritutako “aisialdi eredu berriak” sustatzea da ekitaldi honen asmo nagusia. Hala, antolatzaileek azpimarratu dute norgehiagokak izan dezakeen “lehikortasun kutsua” ezabatu nahi dutela. Helburua ez baita irabaztea, “Euskal Herriko gazteek elkarren artean jolastuz ondo pasa dezaten lortzea baizik”.
XIBA egitasmoaren jaialdian parte hartzeko bidali e-mail bat eibanez@ehi.ikastola.net era edo deitu 658750998 telefonora.