Luis Vil musikagile amurriarrak bere bakarkako laugarren lana aurkeztuko du gaur gauean Laudioko Sorgin tabernan. Hamar eta erdietan hasiko den kontzertu horretan kantagileak bere Prototipo disko berriko doinu gogorrak plazaratuko ditu La Mala Crianza musikari taldearen laguntzarekin.
Rock ilun eta dentsoa letra sozial, politiko zein filosofikoekin nahasten ditu Luisek bere konposizioetan. Bere aurreko Retrato del caos eta Sapos y culebras lanen ildotik mugitzen da honako Prototipo hauxe ere; musikariak “rock bastardo” deitzen duena jorratuz.
Musikaria ez ezik, zinemagilea ere da Luis. Bere lehenengo film laburra (El Secretista) Amurrioko Begibistan jaialdian saritua izan zen. Ondoren Flores de papel filma estreinatu zuen eta indarkeria matxistaren aurkako spot bat grabatu berri du.
Soinua eta ikuskizuna uztartuko ditu amurriarrak bere disko berriaren aurkezpenean. Biharkoarekin nahikorik ez, eta hurrengo ekainaren 24an ere Laudion izango dugu musikaria, Drumgorri aretoa bere gitarra eta ahots garratzekin astintzen.
Informazioa gehiago: http://www.luisvil.net/