Pasaden ostiralean OMNIA hautesle taldeak ekitaldi bat egin zuen Laudioko Udal Lanbide Heziketa Zentroan. Dozenaka pertsona hurreratu ziren herriko hainbat bizilagunek sortutako plataforma honen nondik norakoen berri izateko.
Alvaro Barriosek, Berlojatzen plataformako lehendakariak, eman zion hasiera hitzaldiari. Alvarok argi utzi nahi izan zuen OMNIA ez zela Berlojatzenen luzapen bat. “OMNIA Berlojatzenetik sortu da, baina ez da Berlojatzen, beste kolektibo zein norbanako asko batu baitira proiektura”. Hala, Alvarok azpimarratu zuen ez zuela bere burua hautagai bezala aurkezten, horrela hautesle taldea eta Berlojatzen hobeto bereizteko.
Ondoren, OMNIAk baliatu nahi duen parte-hartze hiritarraren eredua azaldu zuen Alvarosek. Esan zuenaren arabera, hiru dira parte hartze hori kudeatzeko OMNIAk baliatuko dituen ardatzak. Bata herritarren iritzi eta proposamenak jasotzeko sare sozial propio baten eraikuntzan oinarrituko litzateke. Hortaz gain, inkestak eta auzo kontseiluak abian jarriko lirateke.
Ondoren Jose Duartek hartu zuen hitza eta Kontseiluen historia errepasatu zuen, “mota honetako parte hartze herritarra Laudion aspaldi praktikatzen zela” erakusteko.
Nerea Gonzalez alkategaiaren berbaldiaren ostean Etxebarriko alkatea den Pedro Lobatoren unea iritsi zen. Lobatok ere antzeko plataforma baten bidez lortu zuen alkatetza eta parte hartze hiritarrari ezker lortu dituzten aurrerapenez mintzatu zen. Jose Luis Navarra Abadiñoko alkateak itxi zuen hitzaldia, bere herriko esperientzia kontatuaz.
Amaitzeko, OMNIAren zerrendako kide guztiak kontratu bat sinatzera igo ziren eszenatokira. Kontratu horren bidez “hiritarrek parte hartze sistemaren bidez hartzen zituzten erabakiak errespetatzera” konprometitu ziren. Kanpainan zehar burutuko zituzten hurrengo ekintzen berri jaso ostean, bertaratuko guztiek askari batez gozatu ahal izan zuten hautesleekin batera.