Laudioko Udalak anbulatorioko autobus geltokiaren kokalekua lekuz aldatu du. Hala, hemendik aurrera geltokia Altzarrateko errotondan egongo da, Zumalakarregi etorbidean egon beharrean.
Aldaketa hau dela medio, erabiltzaileek ez dute apenas desberdintasunik nabarituko, baina “erosotasun eta segurtasunean” irabaziko dute, Jon Karla Menoyoren arabera. Izan ere, alkatearen iritziz, geltoki zaharra berria baino leku problematikoagoan kokatuta zegoen.
Horretaz gain, kokalekua aldatzeak Zumalakarregi etorbideko trafikoaren malgutasuna bermatuko du, Menoyok adierazi duenez. Izan ere, geltoki zaharra errepidearen beste aldean kokatutako beste geltoki baten parean zegoen, eta bi geltokietako autobusak aldi berean iristen ziren kasuetan etorbideko trafikoa gelditu egiten zen. Gainera, Menoyok azpimarratu duenez, leku aldaketarekin hiru autorentzako aparkalekua lortu dute.
Beraz, hemendik aurrera anbulatorioko autobus geltokia Altzarrateko errotondan kokatua egongo da, anbulatorioaren lurpeko aparkalekuaren sarreraren alboan. Alkatearen iritziz, kokaleku berri hori aukeratu dute trafikorako oztopo izango ez delako eta orain arte ia erabili gabe zegoen berdegune batean kokatuta dagoelako.