Laudioko Udalak txango bat antolatu du Lekeitioko Santa Katalina itsasargira Sar Ezazu Hanka ekimenaren barruan. 1862. urtean eraikitako itsasargi hori Euskal Herrian bisitatu daitekeen itsasargi bakarra da. Txangora doazenek eraikina barrutik ikusteko eta bere historia ezagutzeko aukera izango dute, elkarren artean euskara praktikatzearekin batera, hori baita bidaiaren oinarrizko helburua.
Txangoa hurrengo larunbatean, urtarrilak 29an, egingo da. Bertan parte hartzeko 5 euroko sarrera ordaindu beharra dago. Sarrerak Arrañope tabernan lor daitezke urtarrilaren 26ra arte. Bisitak goiz osoa iraungo du eta parte hartzaileak eguerdirako egongo dira bueltan.
Sar Ezazu Hanka udaleko euskara sailak antolatzen duen ekimena da, mintza praktika egiteko.
Umeak ere euskaraz
Laudioar txikiek ere izango dute hurrengo larunbata euskaraz igarotzeko aukera, udalak antolatutako Sorgin Zapatuan. Asteburu horretan 5 urtetik gorako umeek euskal disko-festa parte-hartzaile batez gozatu ahal izango dute arratsaldeko bost eta erdietatik. Horretaz gain, askaltzeko aukera ere izango dute haurrek eta, ondoren, iturri-lasterketan, birla jokoan eta hankaluzeetan ibiliko dira arratsaldeko zortziak arte, betiere euskaraz.