Laudioko hirigunera jaisten den San Joaneko errekaren biderapenerako lanei 2012. urtean eman ahalko litzaieke hasiera. Juanjo Unzaga Hirigintzako zinegotziak adierazi duenez, proiektu horretarako diru bat erreserbatuko da 2011ko aurrekontuetatik, Eusko Jaurlaritzako Uren Departamentuaren eskutik. Hala ere, Unzagak aitortu duenez, “oraindik ez dakigu erreserbatutako kantitatea zenbatekoa izango den”.
Horretaz gain, zinegotziak gaineratu du proiektuaren diseinuaren ezaugarri ugari zehazteke daudela. Izan ere, Udalak proiekturako hainbat proposamen helarazi dizkio Uren Departamentuari. Proposamen horietako bat Zumalakarregi etorbideko zubiaren arketaren altxatzea izango litzateke, zabor-bilketa pneumatikoaren ibilbidea ez oztopatzeko. Beste proposamen bat errekaren bi aldeetan eraiki nahi diren bidegorrietako baten eraikitzea bertan behera uztea izango litzateke, horrela lursail pribatuekiko eragina txikiagoa izan dadin.
Amaitzeko, Unzagak adierazi du Uren Departamentuak idatzitako hitzarmenaren zain daudela. Hitzarmen horretan Udalaren eta Uren Departamentuaren proiektu honekiko elkarlana zehaztuko da. Zinegotziak azaldu duenez, udalaren parte hartzea “gestio kontuetan” izango da batez ere.
Proiektu honen aurrekontua 1,9 milioi eurokoa da. Helburu nagusia errekaren irregulartasun eta biraketa bortitzak leuntzea da, horrela euriteak daudenean errekak izan ditzakeen gainezkaldiak ekiditeko. Besteak beste, errekaren zabalera hamabi metrora handitzea planteatzen da.
Errekak Kunkullu zonaldetik Nerbioi ibaira arte egiten duen ibilbidea biltzen du proiektuak.