Duela bi aste Laudio Ikastolako zenbait ikasle eta ikasle ohi Argeliara abiatu ginen Saharar errefuxiatuen kanpalekuak bisitatzera. Bertan astebete eman genuen bertako familiekin elkarbizitzan saharar herriaren borroka hurbilagotik ezagutu eta elkartasun mezu bat helarazteko asmoarekin.
Hegazkina abenduaren 2an hartu genuen Loiun. Bertako aireportuan Tindoufeko kanpalekuetara zihoan jende askorekin bildu ginen:udan Saharako umeak etxean hartzen dituzten familiekin, beste ikastetxe batzuetako ikasleekin eta abarrekin.
Hegaldiek zeramaten atzerapena zela-eta ordu batzuk itxaroten eman ondoren, azkenean lortu genuen gure bidaiari hasiera ematea. Guztira bi hegazkin abiatu ziren gau hartan Loiutik Afrikarantz. Gu lehenengoan joan ginen eta Tindoufeko aireportu militarrera iristean ordu batzuk egon behar izan ginen han bigarren hegaldiko kideei itxaroten. Hurrengo eguneko egunkari batzuetan bidaiari askoren maletak Loiun geratu zirela aipatu zen. Zorionez, guri ez zitzaigun ekipajeko ezer galdu.
Bi hegaldietako jendea batu bezain laster, kanpalekuetara abiatu ginen autobusez. Hasiera batean Bukra-a herrira joatekoak ginen arren, azkenean Angala izeneko alboko herri batera abiatu ginen. Udaletxearen parean utzi gintuen autobusak eta bertan jaso gintuzten familiek.
Ostiraleko goiz osoa familiekin eman genuen. Arratsaldean, indarrak berriturik, alboko herri batean eraikitzen ari ziren nekazaritza eskola bat bisitatu genuen, hurrengo asteartean inauguratuko zutena. Bertaraino egin beharreko bidaia nahiko luzea bazen ere, ibilbide osoan zehar dozenaka haur izan genituen guri konpainia egiten, bai familiakoak eta bai guztiz ezezagunak zitzaizkigunak ere. Itzuleran, aldiz, gaua gainera erori zitzaigun ustekabean, eta ume horien inguruarekiko ezagutza nahitaezkoa egin zitzaigun etxeetara itzultzeko.
Hurrengo egunetan hainbat ekintza eta bisitaldi egin genituen. Besteak beste, Errepublika Arabiar Demokratiko Saharauiaren parlamentua, dunak edota Erresistentzia Nazionalaren museoa bisitatu genituen, bai eta ospitale nazionala edo inguruko herrietako zenbait eskola ere.
Horretaz gain, aipatzekoa da igandetik asteartera herrian antolatu zen kultura jaialdia. Igande goizean zehar nazio mailako desfile jendetsu bat ikusteko aukera izan genuen eta hurrengo gaueetan hainbat musika eta dantza ikuskizunez gozatu ahal izan genuen herrian bertan.
Bukra-a eskola ere behin baino gehiagotan bisitatu genuen, bertako eraikin batzuk margoztu eta liburutegi baten eraketari hasiera emateko, huraxe baitzen ikastolako eta udaleko diru-laguntzekin abian jarri nahi genuen proiektua.
Familiarekin bizi izandako bizipenak ere oso aberasgarriak izan ziren, eurekin ematen baikenuen egunaren zati handiena: umeekin jolasten, tea edaten, hitz egiten… eta itzulerarako autobusa hartzean agurrak nahiko gogorrak suertatu ziren askorentzat. Ahal bezain pronto itzultzeko asmoarekin iritsi ginen Laudiora.