Larunbat honetan Euskararen Eguna ospatu da Laudion. Goizeko hamar eta erdietatik hasita jende andana hurbiltzen hasi da Iluntze taberna ingurura, bertan eman baitzaie hasiera Jai Koordinakundeak egun honetarako prestatu egin dituen ekintzei. Hala, hamaiketan, bertan bildutako 120 pertsona inguru Landaluze kaletik gora abiatu dira, Larrazabal eta inguruko hainbat baserritan zehar bisita gidatu bat egiteko asmoz. Tarteka euria bota badu ere, parte-hartzaileek proposatutako ibilbidea bukatu dute, gero San Joan ermitaren arkupeetan bazkaria egiteko.
Bien bitartean, Laudioko kaleetan barrena udalak antolatutako jai-egitarauari eman zaio hasiera. Goizeko hamaiketatik hasita, txistulari eta trikitilariak erdiguneko kaleetan zehar aritu dira, elizako arkupean artisau feriari hasiera eman zaion bitartean. Bertara hurbildu denak artisauen azalpenak jasotzeko aukera izan du.
Leku berean, hamabi eta erdiak aldera, behinolako alkatea hautatzeko prozesuaren antzezpena egin da. Horren ostean tabernaz taberna ibili den kantaldia hasi da. Horren ostean ohiko bazkaria egon da elizaren arkupean.
Arratsalde partean giroak bizi-bizi eutsi dio. San Joanen bazkaldu dutenek Dantza Plaza ikuskizunaz gozatu dute eta herrian zeudenek, berriz, Patxi Perezekin dantzatu ahal izan dute Aldaikoerreka plazan .
Aurreko bi ekitaldiak amaituta, laudioarrek parrandari jarraipena eman diote, bai Udalak antolatutako fanfarrea eta kalejirekin, bai Jai Koordinakundeak proposatu duen trikipoteoarekin.