Atzo, Ekainaren 3an, jende ugari bildu zen Laudioko herriko plazan, bakoitzak bere jaietako koadrilaren jantzia soinean zeramalarik. Izan ere, larunbat honetan, San Pedropekoak izan dira herrian, eta hori ospatzeko Jaien Aldeko Koordinakundeak hainbat ekintza antolatu izan ditu.
Horrela, Herriko plazan antolaturiko koadrilen arteko Sukalki lehiaketarekin eman zitzaion hasiera jaiari goizeko bederatzietatik aurrera. Parte hartzaileek gisatu bana prestatu behar zuten; eta, 13:30etararte sukaldatzen egon ondoren, irabazleen izenak jakin ahal izan ziren. Lehenengo postua Basastoak koadrilaren kide multzo batek eskuratu zuen, bigarren postuarekin Zoroak taldeko lagunak geratu egin ziren eta hirugarren saria Zintzarriak koadrilak lortu egin zuen. Sari banaketaren ostean, eta lehiaketara aurkeztutako janaria baliatuz, koadrilen arteko bazkaria burutu egin zen; eta bertsoek arratsaldeko lehenengo orduak animatu egin zituzten.
Ondoren, goizeko seiak aldera, herri guztia alaitu egin zuen kalejira abiarazi egin zen. Eta zeru grisaren ezinegona eta zirimiriaren irregulartasuna ez ziren oztopo izan herriko gazteek (eta ez hain gazteek) tabernaz taberna antolaturiko dantza eta jolasez goza zezaten. Ordu pare bat geroago, kalejira plazara itzuli zen berriz non koadrilek aulkien jolasaren bertsio erraldoi batean jolasteko aukera izan zuten.
Antolatzaileak pozik agertu ziren egunak izandako harrerarekin. Nahiz eta lehenengo edizioek izan ohi dituzten arazoak izan, kuadriletako jende askok parte hartu zutela adierazi zuten eta baita hurrengo urteetan zehar ospakizuna errepikatzeko gogoa erakutsi ere.
Egitarau ofizialari gaueko ordu-batetan eman zitzaion amaiera, Izargi taldearen erromeriaren bukaerarekin. Baina giroak aurrera jarraitu egin zuen, Laudioko kaleetan barrena, tabernaz taberna, gau osoan zehar.