Hiri-ekonomiako plan estrategikoa prest dagoela jakinarazi dute udaletik. Ikertalde enpresa arduratu da plana garatzeaz, eta bilera irekia egingo dute laster, herriko merkatari eta ostalariei aurkezteko.
Herriko merkataritza eta ostalaritzaren egoera du hizpide planak. Beste gauza batzuen artean, azaldu egiten du Laudiok “eredu komertzial historiko bat” mantentzen duela, “industriari loturikoa”, eta ez duela jakin “garai berrietara egokitzen”. Hala adierazi du Iñigo Martinez Cerrillo zinegotziak.
Diagnostikoak zehaztu egiten du baita “gastua banatzeko joera berriak” daudela, “online bidezko salmenta” kasu. Hortaz gain, “gazteen gustu eta ohituretan aldaketak” ere eman direla planteatzen du txostenak. Merkatari eta ostalarien artean “joera pesimista bat” gailendu dela aipatzen du baita diagnostikoak.
Hainbat proiektu proposamen
Martinez Cerrillok nabarmendu du planak baduela bertute bat: “diagnostiko huts bat egitetik harago, aurrera begirako hainbat plantemendu ere egiten dituela”.
Bost ildo proposatzen ditu horretarako:
“Laudio naiz”: Tokiko bezeroekin hurbiltasuna lortzea izango luke helburu, “komunitate enfonke bat lortzeari begira”.
“Laudio, Aiaraldeko ataria”: Aiaraldea “zerbait gehiagoren sarrera gisa” aurkeztea izango litzateke planteamendu honen xedea. “Laudio baliteke oso turistikoa ez izatea, baina Aiaraldearen sarrera gisa saldu ahalko litzaieke turistei eta Bilbotik datozen txangozaleei”, adierazi du Martinez Cerrillok, “txostenak dio bi uren artean dagoela Laudio, Bilbo eta Aiarako Haranaren artean, eta horretaz baliatzea proposatzen du planak”.
“Laudio dibertigarria”: Egutegi bat osatzea proposatzen da, ekintzak gauzateko asteburu zehatzekin, “aisialdi kulturala saltoki eta tabernen jarduerarekin uztartuta”.
“Laudio berriztatua”: Hiri-espazioaren antolamendu egoki bat egitea planteatzen da.
“Bid Laudio”: Ogasun erreforma ugari planteatzen ditu “elkarlan publiko-pribatua” sustatzeari begira. Ogasunak merkataritzatik lortzen duen dirua merkataritza ekintzetara bideratzea ahalbidetuko lukete erreforma horiek, “saltokiak merkatal elkarteen barruan egon edo ez”.
Martinez Cerrillok adierazi du txostenak planteatzen dituen ideia horiek guztiak kontuan izango dituztela datozen urteetan udalak egingo dituen jarduerei begira.