PSE-EE alderdiak mitina egin du gaur arratsaldean Laudioko Aldai Plazan. Idoia Mendiak hartu du hitza bertan. Alderdiak azken lau urteetan Legebiltzarrean eginiko lana azpimarratuaz hasi du hitzaldia lehendakarigaiak. “Euskadik baditu Europaren tontorrera berriz iristeko oinarriak”, azaldu du, baina gaineratu du horretarako beharrezkoa dela “garrantzia duen horretan” zentratzea: “Hazkuntza ekonomikoa, berrindustrializazioa eta kalitatezko enpleguaren sorrera”.
Euskadi “anitz eta kosmopolita”
Elkarrekin Ahal Dugu koalizioaren inguruan mintzatu da gero: “Madrazok bere garaian egin bezala, nazionalistek euren jokoekin jarraitzeko behar duten 'oxigeno burbuila' izango dira Podemosekoak”.
Horren aurrean, “jendearen arazoei jaramon egitea” jarri du Mendiak lehentasun moduan: “Asko dira herrialde moduan ditugun erronkak, baina batera bagaude egin ahalko diegu soilik aurre”.
Zentsu horretan, hautagaiak azaldu du ez duela “Euskadi gorri, berde edo more bat” nahi. “Jendarte bakarra nahi dut nik: plurala, anitza, integratzailea eta kosmopolita”, aldarrikatu du, “mundura irekitako Euskadi bat, guztiak bertan sartu ahal gaitezen, banaketa eta liskar garaira itzuli gabe”.