Asteleheneko udal osoko bilkuran adostu zuten alderdi guztiek neurri gehiago ezartzea amiantoa kontrolpean izateko aho batez.
Omniaren testuari ordezkatzeko mozioa aurkeztu zioten EH Bilduk eta EAJk eta azken horrek egin zuen aurrera. Hainbat puntu jaso zituen.
Amiantoaren inbentarioa
Lehenik eta behin, herriko amiantoaren mapa egingo dute, ez bakarrik udal azpiegituretan. Herritarren laguntza eskatuko dute eta materiala kentzeko beharra egongo balitz, profesionalak kontratatuko dituzte.
Trebakuntza
Udal langileak trebatzen jarraitzeko konpromisoa hartu ez ezik, aurretik udalean lan egin dutenen osasuna bermatzeko neurriak ere ezarri nahi dituzte.
Isurketak kontrolatu
Osalanen aholkuak irizpidetzat hartuta, zehaztu nahi dituzte prozedurak amiantoaren legez kanpoko isurketak ekiditeko. Horretarako harremanetan jarriko dira Arabako Foru Aldundiarekin.
Aldi berean, sistema garatuko dute jakiteko obretan amiantoa dagoen, eta egonez gero, eskatuko dute materiala kentzeko plana. Lan Agintaritzak babestuko ez balu, ez dute lanak egiteko baimenik emango enpresa edo jabeei.
Gainera, Udaltzaingoaren lana ere izango da legez kanpoko isurketak saihestea.
Sentsibilizazio kanpaina
Herritarren artean sustatuko dute amiantoari buruzko ezagutza, modu arriskutsuan manipulatu ez dezaten.
Aipatu guztia finantzatzeko bitarteko ekonomikoak bermatu beharko du udalak.