Akordio bat garatzen aritu da Laudioko Garapen Agentzia azken hilabeteetan, herriko enpresei interneterako konexio egokia bermatzeari begira. Hala jakinarazi du agentziaren lehendakaria den Iñigo Martinez Cerrillok gaur eskainitako prentsaurrekoan.
“Enpresa Forotik atera zen ondorioetako bat da enpresek internet konexio egokiago baten beharra dutela”, azaldu du zinegotziak. Horri begira, Merkataritza Ganbarekin elkarlanean aritu dira, eta interesatuak dauden enpresen artean talde bat egitea pentsatu dute, modu horretan prezio merkeago bat lortu ahal izateko.
30 enpresa daude interesatuta
Bilera bat egin zuten enpresa interesdunekin (30 guztira) iragan abenduaren 20an. “Badakigu interneterako konexioa poligono industrialetan jartzea ez dela etxeetan edo tabernetan jartzea bezain errentagarria horretara dedikatzen diren enpresentzako”, azaldu du zinegotziak, eta adierazi du “pena bat dela” enpresa gehienek “errentagarritasuna zerbitzua eskaintzearen gainetik jartzea”. Vodafone da herriko enpresentzako zuntz optikoa jartzeko prest azaldu du internet hornitzaile bakarra, eta akordioa lantzen ari da garapen agentzia berarekin.