Gazte Gaua aurkeztu du Laudioko Udalak, herriko gazteei zuzendutako programa. “Gazte Planean atera ziren ondorioetako batzuei erantzun nahi die programak, eta harreman eta dibertsiorako espazioak sortzea izango du helburu ”, azaldu du Amets Meaza zinegotziak.
Hainbat tailer eskainiko dituzte horretarako, ostiral iluntzeetan egingo direnak eta hainbat gai jorratuko dituztenak: sexualitatea, artea, kultura, kirola... Gai zerrenda ez dago itxita, parte hartzerako tartea utzi nahi izan baitute. Herriko edozein gaztek helarazi ahalko ditu bere proposamenak gaztegaua@yahoo.com helbide elektronikora mezu bat bidaliaz. Meazak azaldu du hainbat balio sustatu nahi dituztela tailer horiek bidez: “euskararen erabilera, emakume eta gizonen arteko berdintasuna, naturarekiko errespetua, elkartasuna...”.
Lehena, datorren astean
Programa datorren astean abiatuko da, Mindfulness tailerrarekin. Arreta eta erlaxazioa psikologikoki nola garatu ikasi ahal izango da bertan. Sei saiotan banatutako ikastaroa izango da, eta ostiralero egingo da urtarrilaren 13tik otsailaren 17ra bitartean, 19:00etatik 21:00etara Kultur Etxean.
Toki kopurua mugatua izango da. Hori dela eta, interesatuak dauden gazteek aurretik eman beharko dute izena, Udaleko Gazteria Sailera (944 034 850) deituaz edo arestian aipatutako posta elektronikora mezu bat bidaliaz.
Bigarren tailerra xaboi eta kosmetiko naturalei buruzkoa izango da, eta lau ostiraletan luzatuko da, otsailaren 24an hasita.