“Rockein!” musika talde eta bakarlarien lehiaketaren V. edizioa jarri du martxan Basauriko Udalak. Laudioko Udalak bat egin du ekimenarekin, laguntzaile gisa. Ondorioz, Laudioko musika taldeek aukera izango dute txapelketa horretan “tokiko talde gisa” parte hartzeko. Basauri eta Galdakaoko Udalak ere arituko dira laguntzaile gisa.
Datorren astelehenetik (urtarrilak 24) martxoaren 24ra egongo da zabalik egitasmoan izena emateko epea. Hainbat baldintza bete beharko dituzte parte hartu nahi duten talde eta bakarlariek: EAEn edo Nafarroan jaio edo egoitza duen taldekide bat izatea gutxienez, 16 urtetik gorakoak izatea taldeko kide guztiak, disko bat baino gehiago argitaratuta ez izatea, jotzen dituzten abestiak jatorrizkoak izatea eta lehiaketaren aurreko edizioetako batean saririk eskuratu ez izana.
Tokiko taldeen kategorian lehiatzeko, aldiz, beste baldintza bat ere bete beharko da: taldekieetako bat gutxienez Basauri, Galdakao edo Laudiokoa izatea.
Aurkezpen diren talde eta bakarlari guztietatik sei hautatuko ditu epaimahaiak. Seiek joko dute maiatzaren 13an Social Antzokian egingo den finalean. Lau irabazle hautatuko dira guztira, bakoitza bere sari propioekin:
TALDE IRABAZLEARENTZAT:
*EP profesional bat (gutxienez, bost kanta) grabatzea, ekoiztea eta masterizatzea Bilboko El Tigre estudioetan.
*EPa diseinatzea eta editatzea: 500 kopia, CD euskarrian.
*Bideoklip profesional bat grabatu eta ekoiztea.
*Kontzertua Bizkaiko areto garrantzitsuenetako batean edo «MAZ Basauri» Jaialdian (antolatzaileek zehaztuko dute).
TOKIKO TALDERIK ONENARENTZAT:
*Kontzertua Bizkaiko areto garrantzitsuenetako batean edo «MAZ Basauri» Jaialdian (antolatzaileek zehaztuko dute).
EUSKARAZKO TALDERIK ONENARENTZAT:
*Kanta bat grabatu eta ekoiztea.
*Kontzertua Bizkaiko areto garrantzitsuenetako batean edo «MAZ Basauri» Jaialdian (antolatzaileek zehaztuko dute).
IKUS-ENTZULEEN TALDERIK GOGOKOENARENTZAT:
*Kontzertua Bizkaiko areto garrantzitsuenetako batean edo «MAZ Basauri» Jaialdian (antolatzaileek zehaztuko dute).
Iazko edizioan 395 talde eta bakarlarik hartu zuten parte.