Atzo oharra plazaratu zuen Laudioko PSE-EE taldeak nabarmentzeko EH Bilduk aurpegiratzen diola Txaro Sarasua zinegotzi sozialistari Eusko Legebiltzarrean aritu izana. Gainera, taldeak leporatu dio koalizioari Sarasua iraintzea eta ez errespetatzea.
Bestalde, PSE-EEren oharrak gogoratu du legezkoa dela bi kargu publiko izatea, baldin eta soldata bakarra jasotzen bada. Zentzu horretan, PSE-EEk aipatu du Eva Blancok egin duela eta Ander Añibarrok ere.
EH Bilduk, ordea, uste du oharra ez dela taldearena, baizik eta Txaro Sarasuarena, bere jarrera justifikatzeko. Zentzu horretan, gaur Jon Ander Altube alkate ordeak esan du azken udal osoko bilkuraren ostean zinegotzi sozialistak oihukatu ziela EH Bilduko ordezkariei eta Amets Meaza iraindu zuela.
PSE-EE eta EH Bildu
EH Bilduko bozeramaileak aipatu du indarrean dagoen legealdian hainbat eraso jaso dituztela zinegotzi sozialistaren aldetik eta ziurtatu du PSE-EEk ez duela babesten Txaro Sarasuaren jokaera.
Udalbatzaren arazoa
EH Bilduren ustez, Txaro Sarasuaren jarrera arazoa bilakatu da udal osoko bilkuran, zentzuzko eztabaidak oztopatzen baititu.
PSE-EEri deia
Aipatutako guztiagatik EH Bilduk deia egin dio PSE-EEri Txaro Sarasuaren jarrera alda dezan: "uste dugu ez duela islatzen PSE-EEren eta Laudioko talde sozialistaren izaera".