Arabako Federazioak seigarrenez egingo du Hockey eguna. Hector Borgeren esanetan, helburua da hockeyaren lagunak biltzea, kirola protagonista izanda: “Egungo jokalariak eta noizbait arituak elkartuko ditu jardunaldiak; familiak, nagusiak, beteranoak, eskola mailakoak, gurasoak...”. Aurreko edizioetako arrakastari jarraiki, 250-300 lagunek parte hartzea espero dute. 10:00etatik 18:00etara egongo dira lagunarteko hockey partidak.
Maila guztietako kirolariek hartuko dute parte: benjaminek, kimuek, haurrek, gazteek, seniorrak...Horrez gain, umeentzako jolasak prestatuko dituzte. Herri bazkaria ere izango dute, 14:30ean. Egitarau osoa ekainaren 1ean aurkeztuko dute. Bazkarian izena emateko azken eguna maiatzaren gaur da. Horretarako, ordainketa egin beharko da lehendabizi (3035 0045 26 0450069718 ) banketxean, izen-deiturak adierazita. Dena dela, bazkariko prezioa 15 eurokoa izango da, antolatzaileek aurreratu dutenez, nahiz eta 12 urte baino gutxiago dutenek 9 € ordaindu. Bazkariaren ostean hainbat sari zozketatuko dute. Halaber, bertaratzen direnek kamiseta eskuratuko dute oroigarri gisa.
17 talde eskualdean
Egun, 17 hockey talde daude eskualdean. Urteko sasoiaren arabera modalitate batean edo bestean aritzen dira. Belar hockeyan, esaterako, 8 talde daude. Ganbegik lau talde ditu, gizonezkoenak: lehen eta bigarren mailan, kadeteen kategorian eta haurrenean ari dira jolasten. Emakumezkoen taldea ere bada, Hockey Laudio KE. Horrez gain, eskoletan ere ari dira praktikatzen: Latiorro (Benjaminak) eta Laudio KE zein Latiorro (Aurrebenjaminak), kasu. Areto hockeyan, berriz, 9 talde daude: Ganbegi (1.maila), Hockey Laudio (1.maila), Rapid Apill (Gazte maila ), Satorrak (Emakume gazteen maila), Ganbegi (Haur maila), Hockey Laudio KE (Kimuak), Latiorro (Benjaminak), Laudio (Aurrebenjaminak) eta Latiorro (Aurrebenjaminak).
