Mozio bat aurkeztuko du OMNIAren udal talde politikoak gaur arratsaldeko udal osoko bilkuran. “Oposizioko kideen jarduna duintzea” izango da mozioaren xedea, udal talde politikoko kideek adierazi dutenez.
OMNIAk gogorarazi du 17 zinegotzitik 5 baino ez direla EH Bildurenak, eta nabarmendu dute oposizioko kide bat bera ere ez dagoela liberatua.
Horrek euren lana “modu duinean” egitea galarazten die, talde politikoko kideek azaldu dutenez. “20.000-40.000 biztanle inguruko herri gehienetan oposizioko talde bakoitzeko kide bat dago behintzat liberatua”, azaldu dute.
Hori da mozioaren bidez eskatzen dutena: “Talde bakoitzari duen ordezgarritasunaren araberako liberalizazioa ematea”.
EAJ eta OMNIA udal taldeetako kide banari liberalizazio osoa ematea planteatzen du mozioak, “alkateorde baten soldata berarekin”. PSE-EE eta PPko taldeek, aldiz, liberalizazio erdi bana izango lukete.
Ildo horretatik, beste gauza bat eskatzen du baita mozioak: “oinarrizko lan bermeak” ematea bere lan-jarduna ordezkari politikoaren zereginetara mugatzeko prest dagoen zinegotzi orori.
Hortaz gain, “protokolo bat” eratzea ere eskatu dute OMNIAko kideek, “oposizioaren jarduna errazteko”.
EH Bilduren erantzuna
Mozio horren inguruan galdetuta, EH Bilduk adierazi du ez duela “politikaren duintzea” OMNIAk bezala ulertzen. “Mozio horretan argi ikusten da zeintzuk diren OMNIAren lehentasunak”, salatu du Jon Ander Altube zinegotziak, eta aurreratu du ez dutela mozioaren alde bozkatuko.