Indarberrituta iritsiko dira Laudioko koadrila historikoak aurtengo jaietara. Iaz egin zuten euren arteko lehen topaketa. Hainbat kalejira eta ekintza egin zituzten festetan, eta aurten ere antzeko zerbait antolatzeko asmoa dute. “Lehen urtea izan zen iazkoa, probazkoa. Egon zen jende ugari azkenean kalera atera ez zena eta aurten animatuko dena”, adierazi du ekimenaren sustatzaileetako bat den Fabian Hernandez Perezek. Hori dela eta, aurten parte hartzea handiago izango dela aurreikusten dute antolatzaileek. “Jende gehiago aterako da euren antzinako koadrilako jantziekin, modu sinbolikoan bada ere”.
Los Yumas eta Scorpio
Aurkeztu dute dagoeneko jaietarako prestatu duten egitaraua. Jaien lehen bi egunetan egingo dituzte ekintzak. Abuztuaren 15ean txosna jarriko dute elizako arkupeetan. Musika emanaldia eskainiko dute bertan Los Yumas eta Scorpio taldeetako kideek, 15:30ean. 16an, aldiz, antzinako koadrilen arteko bazkaria egingo dute, toki berean. Hortaz gain, beste hainbat kalejira eta ekintzetan hartuko dute parte koadrila historikoetako kideek, kaleak euren alkandorekin koloreztatuaz.
Ñorála, Txairoak, Aziak, Diablos Negros, Rakatapla, Kiowas, Lagunak, Los Coyotes, Larrako Gazteak, Saguzarrak, Galtzagorri, Zoroak, Galtzagorri, Alaiak, Kilkerrak, Jatorrak, Los X eta Alaiak. Horiek dira koadrila historikoen zerrendan dauden taldeak, baina aurten talde gehiago aterako direla uste du Hernandezek. “Egongo dira baita baserritarrez jantzita aterako diren norbanakoak, euren koadrila deseginda dagoelako”. Aspaldikojaiak.wordpress.com web-gunean topatu daiteke egitarauari buruzko informazio gehiago.
EGITARAU OSOA
Abuztuak 15: Txupinazo Eguna
11:30 // Antzinako koadrilen topaketa, txistulariekin
11:45 // Kalejira txistulariekin, herriko plazara arte
12:00 // Txupinazoa erradloi eta buruhandiekin
Jarraian kalejira txistulari, erraldoi eta buruhandiekin
Geroaxeago, tabernen arteko poteoa txistulariekin
15:00 // Talo eta ogitarteko salmenta elizako arkupeetan
15:30 // Musika jaia Yumas eta Skorpio taldeekin
Ondoren kalejira txistulariekin Zumalakarregi etorbideraino, bertan egingo den ski-taula txapelketan parte hartzeko
Abuztuak 16
11:30 // Bazkaltzeko topaketa txistularien musikarekin batera
Jarraian, kalejira txistulariekin
13:30 // Poteoa txistulariekin Laudioko erdigunetik
15:00 // Antzinako koadrilen arteko bazakaria elizako arkupeetan
Bazkalostean 70, 80 eta 90. hamarkadetako musika egongo da, 18:00ak arte
Ondoren San Rokeko kalejira, Zoroak Inkurtul Taldearen eskutik
22:00 // Bon Scott Revival Show (AC/DCren tributua, Zumalakarregi etorbidean)