Auzo elkarteek jasoko dute aurten Urrezko Katxia Txosna Batzordearen eskutik. Latiorro, Areta, Ugarte eta San Joan Astobitzako Jaiak antolatzen dituzten taldeek jasoko dute oroigarri hori sanrokeen lehen egunean, txosnagunean.
Modu horretan goraipatu nahi du Txosna Batzordeak auzoetako jaiak antolatzeko baliatzen den eredua. “Jendearen inplikazioa handia da eta lan-talde batek hartzen du bere gain antolakuntzaren ardura. Jaiak herritik eta herriarentzako egiten dituzte auzoetan”, azaldu dute Txosna Batzordeko kideek, eta nabarmendu dute hori dela Laudioko Jaietarako bilatzen duten gauzak egiteko modua. “Urteak daramatzagu eredu hori aldarrikatzen herriko beste elkarte batzuekin batera”.
Egun osoko egitarauak
Aurreko urteetako ildoari jarraiki, egitarau anitz eta oparoa aurkeztu du Txosna Batzordeak aurtengo jaietarako. Batzordeko kideek nabarmendu dute garrantzi gehiago ematen saiatu direla “goizeko eta arratsaldeko egitarauari”. Hainbat bertso-saio eta antzerki emanaldi eskainiko dituzte horretarako: Ez da kasualitatea (24an) eta Erradikalak gara (25ean), besteak beste. Hortaz gain, familiagunea egongo da goiz guztietan, 15ekoan eta 27an salbu.
Hala ere, mantendu egingo dute gaueko eskaintza, musika eskaintza zabalarekin. Radio Revolución, Urrats, Tximeleta, Childrain, Eskean Kristo, Zazkel, Huntza, Akerbeltz, Soulbreaker Company, Patxuko Nice eta Marianitoz Blai taldeak igoko dira Aldai plazako oholtzara. Afari musikatuak egongo dira baita, Kometa Urdinak, Boogie Riders, Joseba Irazoki eta MobyDick taldeen eskutik.
Odoloste Eguneko bazkaria
Aspaldi egiten zen ekintza bat berreskuratu dute baita aurtengo egitaraurako: Odoloste Eguneko bazkaria. “Sagardotegi formatukoa izango da”, azaldu dute batzordeko kideek, “garrantzitsua iruditzen zitzaigun ekimen horri berriz heltzea, odolosteena baita bazkari herrikoirik gabeko egun bakarra”.
Txosnaguneko kideen nabarmendu dute boluntarioen lanari esker lortzen dutela arestian aipatutako ekintza guztiak aurrera ateratzea, eta auzolanean parte hartzeko gonbita luzatu diete herritarrei: “interesa duenak sare sozialen bidez jarri daiteke gurekin harremanetan”.