Nomeolvides elkarteak janari bilketa egingo du gaur eta bihar bitarte herriko supermerkatuetan APDEMA-ko (Adimen-Ezintasuna duten Pertsonen aldeko Arabako Elkartea) kideen laguntzarekin batera.
Herriko familientzako elikagaiak batzeko laguntza eskatu dute. Bilketak Eroski City, Berriak eta maxi Eroski supermerkatuetan antolatu dituzte, supermerkatuen ordutegi komertzialaren barruan. Iragarri bezala, boluntarioek peto urdina eramango dute soinean eta janaria biltzeaz gain, Apdema elkarteak egiten duen lanaren berri emango dute.
Oinarrizko produktuak jasoko dituzte: esnea, olioa umeentzako elikagaiak, garbiketarako produktuak, kontserbak, lekaleak, arroza eta pasta. Nomeolvides elkarteak kolaboraziorako beharra azpimarratu du, aurreko janari-bilketa kanpainan jasotako produktuak guztiz agortu ostean.
Elkarteak azaldu bezala, jasotako produktuekin loteak egiten dituzte beharra duen familia orok mota guztietako produktuak, eskuratzeko aukera izan dezan. Herritarren harrera ona eta laguntzeko prestutasuna ere eskertu nahi izan du Nomeolvides elkarteak.