Bi mozio aurkeztuko ditu Laudioko EH Bilduk datorren urriaren 30eko osoko bilkuran.
Lehenengo mozioak Gasteizko Udalak tratamendu mekaniko biologikorako instalazioan hondakinak isurtzeko tasaren igoerari egiten dio erreferentzia. Gasteizko udal gobernuak Alderdi Popularraren laguntzaz %20 garestitu nahi du tratamendu horretan hondakin organikoak isurtzeagatik Arabako udalek ordaintzen duten tasa.
EH Bilduk gogorarazi du Araban sortzen diren hondakinen %28a dela bakarrik hiriburutik kanpoko herri eta koadriletan sortua. Igoera honekin, EAJk eta PPk Gasteizeko diru-kutxa, gainerako arabarren kontura bete nahi dutela uste du Laudioko EH Bilduk.
Koalizioaren hitzetan, Gasteizko Udal Gobernuak hondakinen tratamenduaren gestio oso txarra burutu du eta tasaren %20ko garestitze horrekin eragindako gainkostua Arabako gainerako herritarrei ordainarazi nahi zaie. Era berean, Arabako foru Aldundiaren esku hartze eza salatu du.
Urriak 12
Bigarrena, urriaren 12a “Herri indigenen eta kultura-aniztasunaren aldeko egun” izendatzearen aldeko mozioa da.
Espaniako festa nazionala, Amerikako aurkikuntzaren oroigarri gisa ospatzen dena, dozenaka milioika indigenen heriotza eragin zuen konkista odoltsuan oinarritzen dela salatu du EH Bilduk. Udal taldeak festa inposatutzat salatzen ditu urriaren 12ko ospakizunak, bai Latino-Amerikako herrietan zein Euskal Herrian bertan.
Horren aurrean egunaren ulerkera aldatzeko proposamena egin du. Amerikar kontinenteko herrialde askotan egin bezala (Venezuelan 'erresistentzia indigenaren eguna', Costa Rican 'kulturen eguna'...) helburua da gurean ere 'Herri indigenen eta kultura-aniztasunaren aldeko egun' bezala izendatu eta ezaugarritzea.
EH Bilduk Euskal Herri osoko udaletxeetan aurkeztu ditu antzeko mozioak. Esaterako, Iruñeako Udalak aurreko astean eztabaidatu eta onartu zuen.