Nekazal eremuko bideen inbentarioa egin du lehenbizikoz Laudioko Udalak. Behin-behineko proposamena aurkeztu zuten iragan astean, azaroko bilkuran landuko baita gaia. Amets Meaza zinegotziak azaldu duenez, auzo batzarretan askotan atera da beharra: “Martxoko udalbatzan aho batez onartu zen”. Meazaren hitzetan, baliabideak areagotu dituzte.
Astean bitan Arreta Zerbitzua jarri dute informazioa aurkeztu nahi izan dutenentzat. Era horretan bildu dituzte landa eremuko bide guztien kokapena eta ezaugarriak jasotzeko fitxak, besteak beste. “Jasotako alegazio batzuk osotasunean txertatu ditugu, beste batzuk baztertu, eta gutxi batzuk moldatu. Proposamen hori da onarpen fasera igaroko dena”.
Gaur arte inbentariorik egon ez dela eta, azterketaren beharra eta garrantzia azpimarratu du zinegotziak: “Baserritarren eskaera izan da, bidearen jabetza eta publikotasuna argi izateko dokumentuaren beharra zegoen”.
2010ean abiatu zen prozesua, eta zazpi urteren ondoren espero dute onartzea. Hala, hemendik aurrera dokumentu hori izango dute oinarri auzokide, erabiltzaile eta udalaren arteko arazoak kudeatzeko.