Laudioko Udaleko talde mistoan kokatuko da Txaro Sarasua. PSE-EEko zinegotzia izan da orain arte, baina alderdia ordezkatzeari uztea erabaki du, ez dagoelako ados herriko idazkari berria hautatzeko eman den prozesuarekin. Hala jakinarazi du prentsa-ohar baten bidez.
Iragan astean afiliatuekin eginiko batzarra “iskanbilatsua” izan zela salatu du Sarasuak. Bertan hautatu zuten Juanje Merchan idazkari berria izateko, “bi botoren aldearekin”. Bileran “ez-ohiko tentsioa” egon zela adierazi du zinegotziak, “oihu eta kexa ugarirekin eta bozketa paperak manipulatu egin zirela zioten ahotsekin”. Bere aita erasotzen saiatu zirela gaineratu du Sarasuak.
Afiliatuen %30aren baja
Bere ustez, gertatutakoaren xede bakarra bera udaletik kanporatzea zen, bere zinegotzi-postua idazkari berriak bete zezan. “Jarrera mafiosoetatik gertuago dauden taktikak” baliatu zituzten horretarako, Sarasuaren hitzetan. PSE-EEko bozeramaile ohiak gaineratu du gatazka horrek “Laudioko afiliatuen % 30a” alderditik ateratzea ekarri duela.
"Akusazio faltsuak"
Arabako PSE-EEk adierazpenak egin ditu gertatutakoaren harira hainbat komunikabideetan eta ziurtatu du eginiko akusazioak faltsuak direla. Hortaz gain, zinegotzi kargua uzteko eskatu dio Sarasuari.
