Gaur jakinarazi du Alvaro Barriosek ordezkari eta bozeramaile lanak utziko dituela Omnian. Politikoak adierazi du ez dela izan borondatez hartutako erabakia, baizik eta EH Bilduko udal gobernuaren jarreraren ondorio.
Izan ere, Omniako kideak salatu du alkatetza duen koalizioak ez duela onartu jarduera osoko soldata bideratzea oposizioko taldeei, eta horrek eragotzi diola bere lana behar den moduan egitea.
Alvaro Barriosek aldarrikatu du oposizioa egiteko beharrezkoa dela denbora ugari batzordetan parte hartzeko edota txostenak modu egokian aztertzeko. Omniako sortzaileak ziurtatu du bere bitartekoekin egin duela orain arte hori guztia. Zentzu horretan, leporatu dio EH Bilduri "bide ez demokratikoak" hartzea oposizioa oztopatzeko.
Gauzak horrela, Barriosek azaldu du esparru pribatuan lan egiteko eskaintza onartu behar izan duela eta horrek eragotziko diola bere betebehar politikoei heltzea. Alderdi independenteko kideak uste du EH Bilduk hori jakinda ez duela ahalbidetu lanaldi osoko soldata oposizioko kideentzat.
Hala eta guztiz ere, Alvaro Barriosek iragarri du bere helburua dela 2019an Omniako zerrendaburua izatea berriro ere, eta alkatetza lortzea.
Bozeramaile lanetan Nerea Gonzalezek hartuko du bere tokia eta udal osoko bilkuran eta batzordeetan Endika Ibañezek ordezkatuko du. Abenduaren 26ko udal bilkuran jadanik ez du parte hartuko Barriosek.