Laudioko oposizioko talde guztiek mozioa osatu dute gaur eztabaidatzeko udalbatzan. Testuan eskatu diote EH Bilduri Felix Mugurutza euskara teknikariaren egoera aldatzeko EUDELeko Toponimia Batzordeari dagokionez. Mugurutzak azaldu du lau urte zeramatzala bilera horietan udal langile moduan parte hartzen, eta salatu du orain "arrazoirik gabe" ukatu diotela zita horietara bere lanorduetan joateko eskubidea. "Langile publikoa izanda nire eskubidea da", aldarrikatu du euskara teknikariak.
EAJ, Omnia, PSE-EE, PP eta talde misto independentearen ustez, batzorde horretan teknikariak udala ordezkatzen du langile gisa. Hortaz, euren aburuz, ez luke opor egunik eskatu beharko bertan parte hartzeko. Horrez gain, oposizioak ez du normaltzat jo egoera.
Mugurutzak berak salatu zuen bizi duen egoera bere blogean eta sare sozialetan plazaratutako mezu batean. Oihartzun handia izan zuen euskara teknikariaren kontaketak, eta orduan erabaki zuten opozisioko taldeek mozioa aurkeztea. Gaur arratsaldeko osoko bilkuran eztabaidatuko da.
"Bide ez egokiak" EH Bilduren ustetan
Bestalde, EH Bilduk adierazi du udalbatza ez dela lekua horrelako gaiak lantzeko. Iñigo Martinez zinegotziak azaldu du bestelako esparruak daudela udal langileen lan baldintzak eta aldarrikapenak jorratzeko.
Zentzu horretan, EH Bilduren ordezkariaren aburuz, oposizioak gai hori baliatu nahi du udal gobernu taldea kaltetzeko.