"A Bocados" ETB2ko telebista saioak pagotxa topatu du Laudion. Izan ere, atzo Iluntze tabernan eta Basozabalen egon ziren atal berrietarako edukiak grabatzen.
Hori gutxi balitz, "Bizi Poza" txokoan egindako saioa emititu zuten, telebista-katearen atarian dago ikusgai.
Pintxoa Iluntzen
Hector Borge Iluntze Tabernako kideak azaldu du "Explosión" pintxoa prestatu zutela atzo telebista saiorako. "11:00ak aldera etorri ziren eta pintxoa nola egiten dugun jaso nahi zuten hasieratik. Hau da, kalabazina, piperrak, bakailaoa eta zizak kozinatu baino lehen", argitu du tabernariak.
Hectorrek berak deskribatu zien nola egiten den errezeta eta Placi Garciak, ordea, Iluntzeren historia kontatu zien.
Kasualitatez, atzo ere argazkia egin behar zuten Laudioko Pintxo Lehiaketarako, eta, hortaz, "erokeria hutsa izan zen eguna", Borgek nabarmendu duenez. Edonola ere, esperientzia handia dute tabernan, "azken 3 urteetan 3 aldiz agertu gara ETBn, euskaraz eta gazteleraz" gogoratu du.
Basozabalen ere grabaketak
Tabernan egon ostean, mendira jo zuten kameralariek eta gainerako taldekideek; Basozabalera, hain zuzen. Han Felix Mugurutzarekin izan zuten hitzordua eta berak azaldu zien Kanporamartxo edo Basaratuste ospakizunaren ohiturak. Horrela, haragia erre zuten.
Berez, igandean antolatuko dute Basaratustea jaia Laudioko Larrazabal auzoan, San Joan Astobitza baselizan, 11:30etatik 14:00ak arte.