Lautxirrinka Patin Klubeko kirolariek lau domina eskuratu dituzte Barakaldon jokatutako lehiaketan. Espainiako proba izan zen, eta aiaraldearrek fin defendatu zuten euren abilezia. Emaitzak dira horren adierazle: Laia Torrek eta Nahia Berganzak urrezko domina jaso zuten, Izaro Etxebarriak zilarrezkoa eta Sara Castrillok brontzezkoa.
Barakaldon izan zen norgehiagoka, eta 30 bat irristatzaile joan ziren Laudiotik txapelketara. Espainiako lehiaketa izaki, kirolari ugari batu ziren hitzorduan. "175 patinatzailek parte hartu zuten guztira. Nafarroatik, Kantabriatik, Gaztela-Leoiitik... etorri zen jendea". Gurutzeta patin taldea arduratu zen antolakuntzaz. "Irristaketa Artistikoaren IX.Txapelketa Nazioanala izan zen. Klub ezberdinetako kideak elkartzen garelako hartzen du izen hori, baina ez da Espainiako txapelketa". Espainiako txapelketarako txartela, Euskadiko txapelketan eskuratu behar da, Salazarren esanetan: "Horretarako federatuta egon behar da; eta gu, eskola kirolean aritzen gara batez ere". Zehaztu duenez, Laudioko taldetik bi patinatzaile soilik daude federatuta, "maiatzean joango dira Euskadiko txapelketara".
Emaitzarekin pozik
Marimar Salazar elkarteko lehendakaria pozik azaldu da emaitzarekin: "5 eta 15 urte arteko neska-mutilak eraman genituen txapelketara". Arabako talde bakarra direnez, Bizkaikoekin lehiatzen dira. Probari dagokionez, bi minutuko abesti batekin patinatu behar izan zutela azaldu du. "Gazteekin maila zehazteko 'paseak' eta txapelketak egiten dira", zehaztu du. Martxoan izango dute hurrengo erronka, Gardeako frontoian prestatuko baitute maila-proba. "Irristaketa probak egiteko leku falta dago oro har, jende askorentzako tokia egon behar baita".