Seigarren urtez jarraian, Jose Manuel Fernandez Arza 'Jositoren' omenez egindako lasterketa antolatuko du Laudioko Atletismo Taldeak ekainaren 17an.
Zumalakarregi etorbidetik abiatuko da lasterketa herrikoia 11:00etan eta 10 kilometro osatuko dituzte parte-hartzaileek Laudio zeharkatuko duen ibilbidean.
Handitu egin dute parte hartzaileen gehienezko kopurua: 800 korrikalari inskribatu ahalko dira. “Nahi duen orok parte hartzeko aukera izatea bermatu nahi dugu”, azaldu du Alberto Talledok. Atletismo klubeko presidenteak nabarmendu du “korrikalari herrikoiaren figura” indartu nahi dutela. Dortsalak zozketatuko dituzte horretarako parte hartzaileen artean, lasterketa amaitzean.
Umeentzako lasterketak
Haurrek ere izango dute parte hartzeko beta. 8-10 urte bitartekoek 10:20ean izango dute zita, 11-13 urtekoek 10:25ean eta 10 minutu beranduago, aldiz, “Txupete” kategoriakoek.
Memoria bizia
2012an zendu zen 'Josito', Spiuk eta KON kirol marken sortzailea eta kirol-zale sutsua, gaixotasun larri baten ondorioz. Ordutik, lagun eta lankideek Josito Memoriala lasterketa antolatu dute Laudioko atletismoaren sustatzaile amorratua omentzeko.
