Apirilaren 30ean burutu zen Laudioko apirileko Udal Osoko Bilkura. Besteak beste, pentsioen eta maiatzaren 6ko herri galdeketaren inguruko mozioak aurkeztu zituzten.
Pentsioen defentsan
"Arabako Pentsionistak Lanean" elkarteak pentsio duinen defentsa egin zuen udaleko ordezkarien aurrean. Pentsionistek 1.080 euroko pentsio minimoa aldarrikatu zuten Espaniako Gobernuak EAJrekin adostutako 9 euroko igoeraren aurrean. Jeltzaleek, bere aldetik, testu alternatibo bat aurkeztu zuten baina ez zuen beharrezko babesik jaso eta Arabako Pentsionisten mozioa atera zen aurrera EHBildu eta Omniaren aldeko botoei esker.
Herri Galdeketa
Maiatzaren 6an Aiaraldeko sei udalerritan erabakitzeko eskubidearen alde antolatuko diren herri-galdeketen harira mozioa aurkeztu zuen Aiaraldea BAT elkarteak. Udazkenean 4.190 sinadura bildu zituzten eskualdean kontsulta aurrera ateratzeko, orain hori antolatzeko ordua heldu da. Gauzak hala, igandeko galdeketa babesteko eskatu zitzaion Laudioko Udalbatzari. Proposamena EHBildu, EAJ eta Omniaren botoekin atera zen aurrera. Txaro Sarasua, PSE-EE eta PP kontra agertu ziren.
Omniak eta talde-mistoko zinegotziek ere mozioak aurkeztu zituzten. Omniak herriko udal-erakinen lagatzea erregulatzeko araudi baten eskaera egin zuen. Txaro Sarasuak, aldiz, auto-elektrikoen errekarga puntuak instalatzea eskatu zuen, baita Laudioko "mugikortasun-mahaia" martxan jartzea ere. Hiru mozioak onartu egin ziren.