Ostiralean Laudioko Herriko plaza izango da Ermuko jaien topaleku. Hain zuzen, 19:00etan umeentzako diskodantza egongo da, eta ondoren txokolate jana. Horrez gain, parrillada egingo dute. Festak herrira hurbiltzeko helburuarekin erabaki zuten duela urte gutxi, ostiraleko egitaraua Aldai plazan gauzatzea.
Larunbata, egun nagusi
Larunbata izango da egun nagusia. 10:00etan hasiko da "Erronka bertikala" kirol proba, Ugarteko plazatik. Altzarrate Taldeak antolatuko du lehiaketa, eta parte hartze handia aurreikusi dute. Eguerdiko 12:00etan, aldiz, bisita gidatua eskainiko du Eneko Oruetak Ermualden.
Igandean, berriz, historiari helduko diote. Izan ere, "Karlistaldia" izenburupean ibilaldi gidatua egingo dute, Ugarteko plazatik 8:30ean abiatuta. 10:30ean aurreikusi dute Gazteluzarretik igarotzea. Azalpenak Gorka Martinek eta Iban Roldanek emango dituzte.
Artzain txakurren erakustaldia jasoko dute Ermualdeko zelaiek eguerdian. 13:00etan hasiko da saioa, Arateren eskutik. Horrez gain, erromeriarako tartea ere izango da, Lontxo taldea oholtzaratuko baita goiz eta arratsaldez.
Astelehenean, dantzak eta jolasak protagonista
Ohiturei jarraiki, astelehenean ere igoko dira Ermualdera herritarrak. Goizean zehar, umeentzat egur-jolasak egongo dira, Kalakako kideen laguntzarekin. 12:00etan, aldiz, Itxarkundia taldearen dantza erakustaldia egongo da. Umeen ikuskizunarekin bukatuko dira festak, astelehenean 16:00etan izango da azken ekintza.