Administrazioarekiko auzietako epaitegiak erabaki du Laudioko Udalak 831.000 euroren truke erosi beharko duela "Irinen etxea", Aretako zubi erromanikoaren alboan dagoen lantegi ohia, alegia.
Izan ere, jabeek behartu dute desjabetzea, eraikina Hiri Antolamendu Plan Orokorretik kanpo baitago. Lantegi ohia ibaitik oso gertu dago eta horregatik arauetatik at geratu zen. Horren ondorioz, udalak bere gain hartu beharko du hondatuta dagoen eraikina zein inguruko lursailak.
Balorazio positiboa
EH Bilduk ez du balorazio negatiboa egin. Koalizioaren ustetan, etxea bereganatzea beharrezkoa zen, antolamenduak ez baitu ahalbidetzen horrela jarraitzea, eta legedira egokitu behar da ingurua.
Gainera, udal ordezkariek nabarmendu dute administrazioarekiko auzietako epaitegiak berretsi duela Laudioko erakundeak Arabako desjabetzeko lurralde-epaimahairi egindako eskaintza. Diru kopuru hori egokia ez zela iritzita epaitegiko bidea hartu zuten jabeek.
Beste kasu bat: "Españica etxea"
Jon Ander Altube alkateordeak gogoratu du "Irinen etxea" ez dela kasu bakarra. Berez, "Españica etxea" egoera berean dago. Isasi, Ugarte, Goienuri eta Sagastiko bidegurutzean dagoen eraikin zaharra HAPOtik kanpo geratu zen duela urte batzuk, aldaketa gauzatu eta gero.
Horregatik, noizbait udalak bereganatu beharko du etxea, eta esku hartu orubea lege barruan egon dadin.