Iragan maiatzaren 8ko herri galdeketaren ostean, Aiaraldeko Gure Esku Dagoko kideek nabarmendu zuten ekimen hura “lehen pausoa” baino ez zela izan. Argi zuten zein zen hurrengoa: igande honetan -ekainak 10- egingo den erabakitzeko eskubidearen aldeko giza katea. Donostia, Bilbo eta Gasteiz lotuko ditu ekimenak, 201,9 kilometroko ibilbidea eginez. 100.000 herritarren parte hartzea aurreikusi dute.
Giza-kateak goitik behera zeharkatuko du Aiaraldea. Arrankudiaga-Zollotik sartuko da eskualdera eta Arakaldo, Laudio, Aiara eta Amurriotik igaroko da, Altubetik ateratzeko jarraian. 20 kilometro baino gehiago egingo ditu ekimenak eskualdean barrena. Baina kilometro guztiak ez dira Aiaraldeko bizilagunen eskuetan egongo. Bizkaiko hainbat herritatik bertaratuko da jendea katea osatzen laguntzeko. Aurreikuspenen arabera, 10.000 pertsona baino gehiago bilduko dira eskualdean. Erdia kanpotik etorriko dira eta beste erdia eskualdekoak izango dira.
Giza-katean parte hartzeko beharrezkoa izango da aurretik izena ematea. Internet bidez egin daiteke, Gureeskudago.eus atarian. Modu presentzialean izena emateko aukera ere egongo da. Urduñan gaur -maiatzak 7- eta bihar egongo dira Gure Esku Dagoko kideak, 19:00etatik 20:00etara Alondegian. Laudion eta Amurrion, aldiz, Gure Esku Dagoren egoitzetan eman daiteke izena. Modu indibidualean baino, “koadrilan edo familian bilduta” izena emateko deia zabaldu dute antolatzaileek.
Katearen osteko ekintzak
12:00etan egingo da giza katea, eta ordu erdiko iraupena izango du. Ondoren hiriburuetara bideratuko da jendea, erabakitzeko eskubidearen aldeko jaiari jarraipena emateko. Hala ere, eskualdean ere egongo da eguna luzatzeko aukera. Amurrion herri bazkaria egingo dute, eta Peru Selektah-k girotuko du arratsaldea. Txokogorrin eta Batzokian daude salgai otordurako tiketak.
Arrankudiaga-Zollon ere egingo dute bazkaria. Ondoren, Hilean Bariku Bat eta The Pushermen taldeak arduratuko dira egunari amaiera emateaz.