Ekainaren 17an zeharkatuko ditu Josito Memoriala herri-lasterketak Laudioko kaleak. Aurreko edizioetan bezala, ehunka korrikalari espero dituzte antolatzaileek. Dortsal kopurua handitu dute aurten, inskripzio kopurua 800 lasterkarira igoz. Hain zuzen ere, herri lasterketako parte-hartzaileei eskaini nahi izan diete aurtengo edizioa. “Herri lasterketak aurrera ateratzea posible egiten duten parte-hartzaile orori zuzendua dago, gauzak muntatuz, desmuntatuz edota lasterka eginez” azaldu du Alberto Talledo Laudioko Atletismo Klubeko zuzendariak.
Zumalakarregi etorbidetik abiatuko da lasterketa datorren asteko igandean, 10:00etan. 10 kilometroko luzera izango du.
VI. edizioa izango da aurtengoa, eta, urtero bezala ‘Josito’ Fernandezen memoria oso presente egongo da. Izan ere Laudioko kirolzale amorratua zenaren oroimenez ospatzen da herri lasterketa hau. 2012an zendu zen 'Josito', Spiuk eta KON kirol marken sortzailea eta kirol-zale sutsua, gaixotasun larri baten ondorioz. Ordutik, lagun eta lankideek Josito Memoriala lasterketa antolatzen dute. Laudioko Atletismo Klubeko kideek “herrian sustraituta dagoen lasterketa” dela azpimarratu dute: “korrikalari askoren agendan urte hasieratik markatuta dagoen data da”.
Umeentzako lasterketak
Haurrek ere izango dute parte hartzeko beta. 8-10 urte bitartekoek 10:20ean izango dute zita, 11-13 urtekoek 10:25ean eta 10 minutu beranduago, aldiz, “Txupete” kategoriakoek.
