Ekimena aurkeztu zuten atzo Gasteizen kultura, jendarte, politika eta zuzenbide esparruetako hainbat pertsona ezagunek, exijitzeko Iruña-Veleia aztarnategiko afera behingoz argitzea. Horien artean zegoen Laudioko alkate ohia, Pablo Gorostiaga, hain zuzen.
Berez, Iruña-Veleiako aztarnategian zenbait grafito arrasto topatu zituen Lurmen enpresak zeramika zatietan 2005ean eta 2006an. Enpresa horrek egindako ikerketen arabera, aipatutako elementuek erakusten dute III. mendean euskara eta fede kristaua existitzen zirela Arabako zonalde horretan.
Edonola ere, 2008an Arabako Foru Aldundiak faltsutzat jo zituen grafitoak eta epaitegian salaketa jarri zuen indusketaren arduradunen aurka. Epaiketa ez da oraindik egin eta atzo aurkeztutako testuak azaldu du: "Gure herrian irekita dagoen auzi judizial zaharrena da, horrek Eliseo Gil Zubillaga eta Oscar Escribano Sanz auzipetuei ekartzen dien guztiarekin. Azkenik, 2018ko maiatzaren hasieran jaso dute auzipetuek akusazio idatzia: Eliseo Gilentzat Arabako Aldundiak zazpi urte eta erdiko kartzela zigorra eta 285.000 euroko isuna eskatzen du eta Estatuko Fiskaltzak bost urte eta erdiko kartzela eta ia 300.000 euroko isuna. Oskar Escribanorentzat, bost urte eta erdiko kartzela eta antzeko isunak".
Zehazki, manifestuaren sinatzaileek eskatu dute Iruña-Veleiako aurkikuntzak aztertzeko Europako 3 laborategi independenteetan, arkeometria teknika aurreratuak erabilita. Hori ez ezik, probak egiten dituzten zientifikoak aurretik iritzirik ez izatea ere aldarrikatu dute: "parteekin zerikusirik ez duten arkeologo entzutetsuek indusketa kontrolatuak egin ditzatela Lurmenek grafien agerlekutzat seinalaturiko lekuen inguruetan".