Uda bizia izango da aurten Ermualden. Indusketen fase berri bati ekin zioten iragan astean. “Kanpainarik luzeena izango da aurtengoa, uztailaren 20ra arte egongo baikara lanean”, adierazi du Sergio Escribanok. Arkeologo laudioarrak azaldu du iaz eginiko lanean sakontzea izango dutela helburu. “Aurreko urteetan topatutako harresia eta eskailerak lurpetik ateratzen jarraituko dugu”. Escribanok nabarmendu du Ermualdeko kasua “oso ezohikoa” dela. “Antzinan material ia guztiak biriziklatzen ziren. Kasu honetan, baina, eliza zaharraren gainean eraiki zuten eliza berria”.
Bisita antzeztuak
Bisita antzeztuak eskainiko dituzte Ermualden, indusketek iraun bitartean. Ekainaren 22an izango da lehen saioa -euskaraz-, 20:30ean. Hilaren 29an gazteleraz eskainiko dute bisita antzeztua, ordu berean. Uztailean ere emanaldi ugari eskainiko dute, 19:30ean guztiak: 7an -gazteleraz-, 8an -euskaraz-, 14an -euskaraz-, 15ean -gazteleraz-, 21ean -gazteleraz- eta 22an -euskaraz-.
Bisitetan parte hartzeko beharrezkoa izango da aurretik izena ematea, Kultur Etxera bertaratuta edo 944034920 telefonora deituta.
Sapo producciones antzerki taldea arduratuko da Ermualdeko indusketetetan oinarritutako eszenak taularatzeaz. “Guk emandako datuak baliatu dituzte eszenak osatzeko. Oso ikuskizun berezia atondu dute”, ziurtatu du Escribanok.
Gaur egungo eliza XV. mendekoa da. Eraikinaren azpian topatu dituzte santutegi zaharragoen arrastoak. XIII. mendeko bat aurkitu dute, eta baita zaharrago bat ere, XI-XII. mendekoa. “Karbono 14arekin tratatzera eramango ditugu hainbat elementu, euren antzinatasuna zehazteko”, jakinarazi du Escribanok.