Sei diru-partida onartu zituen atzo Laudioko Udalbatzak, 145.000 euro guztira. Sei partiden funtsa osotasunean eztabaidatu zuten udal-taldeek, eta guztiak atera ziren aurrera botoen gehiengoa lortuta. PSE-EE alderdia izan zen alde bozkatu ez zuen bakarra: puntu guztietan abstenitu zen.
Onartutako partiden artean zeuden San Pedro elizako arkupea konpontzera edota Laudio Ikastolako "Laudio Txiki" eraikinean obrak egitera bideratutakoak.
Granja kiroldegiko irisgarritasuna egikaritzeko eta frontoiaren proiektua gauzatzeko proiektuek ere jaso zuten babesa. Herriarenak Pilota Elkarteko kideak bilkuran egon ziren frontoiaren harira. Horren onarpenak ateak ireki dizkio egitasmoari eta horren definizioari eta erredakzioari ekingo zaio orain.
Haurtzaroko I. Udal Plana
Omniak “Haurtzaroko I. Udal Plana” osatzeko proposamena luzatu zuen mozio bidez. Plataforma laudioarrak Unicef-en “haurtzaroaren hiri laguna” izendapena lortzea jarri zuen planaren helburu gisa. Udal talde guztiek bozkatu zuten testuaren alde, eta gaztaroa zein nerabezaroa ere kontuan hartu beharko liratekeen eztabaidatu zuten. Gaia iraileko gazteria saileko batzorde informatiboan landuko da.
Zabor eta estolderia tasaren ordainketak
Eztabaida luzea ekarri zuen zabor eta estolderia tasaren kobrantzak. Bi mozio jarri zituzten atzoko Udal Osoko Bilkuran gaiari heltzeko, Txaro Sarasuak bata eta PSE-EEk bestea. Tasaren kobrantzaren atzerapenak hurrengo urteetan eragingo duen desoreka dela eta, berau kobratzeko bi proposamen eztabaidatu ziren, aipatutako mozioetatik abiatuta. Udal Gobernuak azaldu zuen datorren astelehenean bertan ekingo zaiola 2016ko tasaren kobrantzari. Aurkeztutako testuetan ez zen adostasuna lortu, eta ez batak ez besteak ez zuten lortu bozketan aurrera ateratzea.