Azken urteetan oso maila altua izan dute Latiorroko Jaiek. Puntako taldeek jo dute Laudioko auzo horretako festetan, eta jende andana bertaratu da. Iaz jo zuen goia jaiak, Euskal Herriko Marmitako Txapelketa egin baitzen auzoan. 1.300 lagun bildu ziren norgehiagokaren osteko herri bazkarian. Sukaldarien, gastronomiaren eta bertoko kalitatezko produktua maite dutenen bilgune bihurtu zen auzoa.
Aurten, baina, “oso jai xumeak” antolatuko dituzte. Zergatik? “Jendea nekatu egin delako, oso jende gutxi gaude antolakuntzan eta ez dugu aurreko urteetako maila mantentzeko indarrik”. Hala adierazi dute Jai Batzordeko kideek. “Belaunaldi aldaketa baten beharra” dagoela azpimarratu dute; “jende berri eta freskoarekin”. Hala ere, ez dute festa hiltzen utziko. “Egitarau apala antolatuko dugu, Latiorroko jaietan urtez urte errepikatu diren hainbat ekintzekin. Oraindik ez dakite gauean kontzerturik eskainiko duten. “Ez dakigu txosna eta musika jarriko ditugun, indarren arabera baloratuko dugu”.
Jende berriaren beharra
2011an sortu zen egungo Jai Batzordea, baina hasierako lantaldea txikitzen joan da urtez urte. Gauzak hala, jende berriaren beharra dagoela nabarmendu dute jaien antolatzaileek. “Interesdunek sare sozialen bidez eta lateorroko.jaiak@gmail.com helbidera mezu bat bidalita jarri daitezke kontaktuan gurekin”.
EGITARAUA
Irailak 14, ostirala
8:00 // Danborrada
19:00 // Jaien hasiera
20:30 // Antzerkia
Irailak 15, larunbata
8:00 // X. Mendi martxa
11:30 // Umentzako tailer eta puzgarriak
12:30 // Igel txapelketa
14:30 // Herri bazkaria
17:00 // Mus txapelketa
Irailak 16, igandea
9:00 // XXIX. Marmitako Txapelketa
OHARRA: Honakoa behin-behineko egitaraua baino ez da