aiaraldea.eus

“Euskal Herriko ia 100 lagun bilduko ditu Erraldoiketak”

Erabiltzailearen aurpegia Txabi Alvarado Bañares   Kultura  Laudio

ANDER FERNANDEZ, MIKEL HUIDOBRO ETA JULEN ANDA Sorginlarren elkarteko kideak dira. Erraldoiketa ekimena egingo dute Laudioko jaietan, abuztuaren 16an.

Erraldoiketa ekimena egingo duzue Laudioko Jaietan, abuztuaren 16an. Zertan datza?

Julen: Euskara bultzatzeko eta euskal mitologiako pertsonaiak ezagutarazteko asmoz antolatu dugu ekitaldia. Egun horretan umeek aukera izango dute Euskal Herriko beste erraldoi batzuk ikusteko, Laudioko Jaien egitarauaren barruan.

Euskal Herriko hainbat konpartsen topaketa izango da. Zer talde etorriko dira?

Ander: Egitarau oparoa prestatu dugu. Ekimena Laudioko Jaien bigarren egunean egingo dugunez, nahiko zaila izan da egingo diren gainontzeko ekintzekin koordinatzea. Kalejirak egongo dira goizez eta arratsaldez, herriko kaleetan barrena. Eguerdian, aldiz, bazkaria egongo da Gaztetxean. Familia argazkia ere egingo dugu, egunari amaiera emateko. Sorginlarrenez gain, Euskal Herriko hiru konpartsa egongo dira: Bidasoakoa, Txantreakoa eta Ostargi konpartsa.

Mikel: 90 pertsona inguru egongo dira, konpartsa eta laguntzaileen artean.

Ez da erraza izango horrenbeste jende koordinatzea. Zer moduz daramazue antolakuntza?

Ander: Ondo goaz, baina oraindik gauza ugari egitea falta zaizkigu ekimena aurrera ateratzeko. Astero egiten ditugu bilerak, ostiraletan. Azken bilerak antolatzen gabiltza orain, gero jendeak oporrak hartzen dituelako eta dena azken unera arte uztea ekidin nahi dugulako.

Laudioko Jaien ostean, beste ekimen bati ekingo diozue irailean: Sorginlarrenen bigarren urteurrena. Zer prestatuko duzue?

Ander: Bai, datorren irailean dugu urteurrena ospatzeko asmoa. Lagundu gaituen jende guztia biltzea eta eurekin eguna pasatzea izango da helburua. Egitarau oparoa osatzen gabiltza horretarako, ekintza ugari prest ditugu dagoeneko.

Bi urte igaro dira Sorginlarren sortu zenutenetik. Zer nolako bilakaera izan du taldeak orain arte?
Julen: Ibilbide zabala egin du Sorginlarrenek bi urte hauetan. 2016an sortu zenetik handitzen joan da taldea apurka-apurka. Lau kide gaude orain, eta espero dugu datozen urteetan jende gehiago batzea. Gauza berriak sortu ditugu, eta hainbat ekitaldi antolatu ditugu, haur zein helduei zuzendutakoak.

Erraldoi eta buruhandi mitologikoen talde bat izatetik, kultura eta aisialdia modu zabalagoan lantzera pasa zarete.

Ander: Hala da, bai. Hala ere, aurten mendi irteera gutxiago egingo ditugu, Erraldoiketa antolatzeak lan handia ekarri digulako.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa