Laudioko Udalak herritarren arreta zerbitzua indartzeko asmoa du. Urriaren 1etik aurrera nahi dute jarri martxan ordutegi berria, jakinarazi dutenez. Hain zuzen, goizetan ez ezik, astean birritan -astelehen eta asteazkenetan- egongo da arratsaldez zabalik, 7;30etik 19:00etara.
Gainera, egungo eremua txiki geratu dela iritzita, berregokitu egingo dute. "Itxaron gela, mahaien antolaketa... berrituko ditugu", aurreratu du Jon Ander Altube zinegotziak. Ordutegia handitzeko behargin kopurua ere areagotuko dute.
Horretarako, gazteak lan-merkatuan txertatzearen alde egingo dute apustu, Lanbideren programa baliatuta, eta 2 gazte kontratatuko dituzte administrari zereginei heltzeko. Hala, lantaldeari batuko zaizkie behargin berriak, eta guztien artean gauzatuko dituzte txandak. Jon Ander Altube gobernu taldearen bozeramailearen hitzetan, "herritarren beharrak zentralizatzea da helburua". Izan ere, gaur egun hiru solairutan barrena ibili behar dira dagokion arloan idatzizko sarrerak edota eskakizunak egiteko.
Fitxaketa berrien egitekoak arreta presentziala eta telefonikoa, sarreren kudeaketa, erroldarena eta abar izango dira. "Zenbait auzo asanbladetan herritarrek egindako eskaera izan da", azpimarratu du Iñigo Cerrillo zinegotziak.
Hiru gazteren kontratazioa
Udaletxerako 2 administrariez gain, hirugarren gazte bat kontratatuko dute Garapen Agentzian laguntzeko. 155.000 euroko diru-laguntza izango du tokiko erakundeak horretarako, gazteen artean enplegua sustatzeko. Hirugarren jardunari dagokionez, Cerrillok argitu du Garapen Agentziako proiektuetan laguntzeko kontratatuko dutela; zoru industrialaren azterketan, besteak beste.