Erdiguneko zenbait bideren konponketaren berri eman du Laudioko Udalak. Aurrekontua 285.000 eurokoa da, eta landa eremukoa 60.000 eurokoa. Hortaz, guztira, 345.000€ bideratuko dira lanetara, Amets Meatza Castañares zinegotziaren hitzetan.
Enpresek 20 eguneko epea izango dute euren eskaintza aurkezteko. Behin lanak esleituta, 6 aste izango dituzte tokian tokiko proiektuak bukatzeko. "Diru partida gehiena Karmen kalearen atonketan erabiliko dugu, Jose Arrue eta Araba kaleen bitartean", zehaztu du gobernu taldeko kideak. "Konkorrak kendu egingo ditugu, espaloiak egokituta". Halaber, industrialdeko zenbait gune ere hobetuko dituzte: Ikazkin kalea edota Katuxa Ibarra kasu. Era berean, Zubiko Kurajoko oinezkoen ibilbidea berrituko dute; Nerbioiko parke linealeko lehen zatia, hain zuzen.
Aparkalekuetan hobekuntzak
Bestalde, herriko aparkalekuak ere finduko dituzte. Horien artean daude Ellakuriko igerilekuen azpiko aparkaleku ilada, edota Gardea auzoko Hirugurutzetako ibai ertzeko aparkalekua. Horrez gain, Motxotekale kalean zein Kamaraka eta Arantzar bitartean ere egingo dira lanak. "Iaz nagusiki errepide nagusian zentratu ginen, aurten pabilioien beste inguruetan", aipatu du Meatzak.
Landa eremuetako konponketak
Herrigunean baino azkarrago gauzatuko dituzte nekazal eremuetako konponketak, enpresa irabazleak 2 hilabete izango baititu horretarako. Dena den, eskaintzak aurkezteko epea berdina izango da: 20 egun. "Lote nagusian Larragibeletik Orueta eta Belduira arteko bidea dago, 3 zati: Aranguti, Olarte, Gaztaintza".
Bestalde, Arrañoko igogailu berria martxan dagoela azpimarratu du gobernu taldeak: "2017ko ekainean hasi ziren lanak, bizilagunen irisgarritasuna errazteko. 468.000€ balio izan du egitasmoak eta Eusko Jaurlaritzak lagundu Udala, 108.000 euroko diru-laguntza emanda". Igogailuaren aldamenean umeen jolas parkea jarri dute, eremua hobetze aldera.