aiaraldea.eus

EH Bilduren "kudeaketa txarra" salatu dute Omniak eta EAJk

Erabiltzailearen aurpegia Izar Mendiguren Cosgaya   Politika  Laudio

Oposizioak gogor kritikatu du San Roke edadetuen egoitza ohia berritzeko egitasmoaren diru-laguntzari uko egitea.

EH Bilduren "kudeaketa txarra" salatu dute Omniak eta EAJk
Edadetuen egoitza zaharrak ia bi hamarkada daramatza hutsik. / Aiaraldea.eus | Ikusi handiago | Argazki originala

EAJk eta Omniak prentsa ohar bana argitaratu dute, EH Bilduren "kudeaketa txarra" salatzeko. Jeltzaleen aburuz, gobernu taldearen kudeaketa "ezereza" da. EAJren hitzetan, Laudioko elkarteek diru-laguntzak oso berandu jaso dituzte, eta ondorioz, herritarrek jarri behar izan dituzte ekintzak aurrera ateratzeko sosak. "Koalizio abertzaleak kudeaketa ontzat jotzen ditu axolagabeki pilatzen diren arazoak", adierazi dute. Horren adibidetzat jo dituzte diru-laguntzak berandu ordaintzea, 2018ko udal aurrekontuak ez aurkeztea edota zabor tasak hiru urtez ez kobratzea, besteak beste.

San Roke edadetuen egoitzako proiektuari uko egitea leporatu diote opozisioko taldeek koalizio abertzaleari. "EH Bilduk ez daki gidatzen, planifikatzen ez aurreikusten Laudiokoa bezalako udal bat". Abertzaleen jarrera ere kritikatu dute: "Hirugarrenei errua botatzen konpontzen dute dena. Oraindik ez dira ohartu kudeaketak lana, konpromisoa eta dedikazioa eskatzen dituela, EH Bilduk kudeaketa ontzat ulertzen duen horretan ez dira ikusten". Hala adierazi du EAJk.

Laudioko EH Bilduren ustez, hauteskunde kanpaina aurreratzen ari dira jeltzaleak. Jon Ander Altube alkateordearen hitzetan, lau urteko balantzearen emaitzak erakutsiko du kudeaketa ona izan den edo ez. 

Omniaren oharra
Omniak, bere aldetik, San Roke egoitzako proiektuari heltzeko interes falta salatu du. "EH Bilduk erantzukizunez jokatzea deitzen dionari guk ezinean ibiltzea esaten diogu". Laudioko Udalak uko egin dio San Roke eraikina -edadetuen egoitza ohia- berritzeari, inbertsioak osoko bilkuran bozkatu zirenean proposamena atzera bota baitzuten opisizioko alderdiek.

Zentzu horretan, 2015-2018 Obren Foru Planean bi proiektu aurkeztu zirela gogoratu du Omniak: Zubiko Kurajokoa eta San Roke egoitzakoa. "Orduko bilkuran adostasunez onartu ziren egitasmoak. Zubiko Kurajoko lanak duela hilabeteak bukatu ziren. Edadetuen egoitzako proiektua, ordea, ez da ezta alderdi politikoen artean aurkeztu. 3 urte izan dituzte halako garrantzia duen obra kudeatzeko, eta orain uko egin behar izan dute", kritikatu dute.

EAJk bezala, kudeaketa txarra egitea leporatu diote EH Bilduri: "Ez bihurtu errudun gainontzeko ordezkari politikoak zuek ez duzuenean ezer egin. EH Bilduk onar dezala 7 urtez geldi izan duela Laudio. Orain ezin da hilabete gutxitan utzikeria hori konpondu". Ildo beretik, arduraz jokatzeko eskatu diote gobernu taldeari, erantzukizunak hartzeko: "Utzi zuen gaitasun ezaren errua besteoi botatzeari eta oposizioaren lana oztopatzeari". 

EH Bilduren hitzetan, maiatzaren 28ko bilkuran aurkeztu zen San Rokeko egitasmoa, eta kontrako 12 boto jaso zituelako baztertu zen. "Gero, oposizioak blokean inbertsioen beste proposamen bat egin zuen; eta bertan ez zen San Rokekoa agertzen. Euren ezezkoak eta proposamenak ekarri du proiektua atzeratzea", adierazi du Jon Ander Altube EH Bilduko bozeramaileak. Dena den, azpimarratu du orain diru-laguntzari uko egin arren, egitasmoa hurrengo urtean gauzatu nahi dutela: "2020-2021 Foru Planaren deialdian berriro aurkeztuko dugu proiektua".

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa