Dena ondo bidean, Ermu Andra Mariko apaiz etxea eta Ugarteko plazan gauzatu behar diren obrak azken urratsetan sartzen ari dira. Izan ere, Laudioko Udalak esleipenak indarrean jarri ditu. Berez, apaiz etxeko lanetara aurkezteko epea urriaren 10ean bukatuko da.
Horretara 154.205 euro bideratzea aurreikusi du erakundeak eta helburua da teilatua konpontzea eta barruko partea egokitzea. Izan ere, tokiak balio beharko du ostalaritzarako beheko solairuan eta negozioa kudeatuko dutenak goiko solairuan bizi daitezen. Tabernak barra, sukaldea, jantokia eta komunak izango ditu. 4 hilabete izango du enpresak dena amaitzeko.
Ugarte plazan bi ardatz izango dituzte obrek. Alde batetik, umeentzako elementuak jarri eta irisgarritasuna bermatu beharra izango du enpresak, zenbait oztopo kenduta -pergola, adibidez- eta arrapala eginda. Bestetik, 415 metro karratuko zabalerako estaldura instalatuko da. 350.700 euro balioko du lehen egitasmoak eta 160.742 bigarrenak.
Haurren jokoak
Umeen aisialdirako hainbat elementu jarriko dute: kulunkak, txirristak, tirolina, saskiak edota aniztasun funtzionala dutenentzako jokoak.