aiaraldea.eus

Kultura Etxea zaharberritzeko obren lehen fasea urtea amaitu baino lehen lizitatuko du Aldundiak

Erabiltzailearen aurpegia Txabi Alvarado Bañares   Kultura  Laudio

Berogailu sistema, estalki eta leiho berriak jarriko dituzte lehen fase horretan. Arabako Aldundiak adierazi du udalak Kultura Etxearen balizko erabilpenen berri eman diela proiektua diseinatzeko.

Kultura Etxea zaharberritzeko obren lehen fasea urtea amaitu baino lehen lizitatuko du Aldundiak
Cristina Gonzalezek -ezkerrean- gaur eguerdian bisitatu du Lamuza Parkea. / Aiaraldea.eus | Ikusi handiago | Argazki originala

Urtea amaitu baino lehen lizitatuko du Arabako Foru Aldundiak Laudioko Kultura Etxea zaharberritzeko obren lehen fasea, "2019. urtearen lehen sei hilabeteetan egiteko". Lehen fase horren barruan honako lan hauek sartuko dituzte: Berogailu sistema, estalki eta leiho berriak jartzea.

"Horretarako udalak eman digu espazioen balizko erabilpenen berri", azaldu du Cristina Gonzalezek. Enplegu, Merkataritza eta Turismo Sustapen Saileko foru diputatuak azaldu duenez, obren bigarren fasean eraikinen barrualdea berritzeari ekingo liokete, "barrera arkitektonikoak kentzea" helburu. "Obra horiei esker eraikina modernizatuko dugu, baina jatorrizko estetika gordeta".

Obra batzuk egiteke Kasinoan eta Musika Etxean
Gonzalezek jakinarazi du oraindik obra txiki batzuk egiteke dituztela. "Segurtasun ate bat jartzea falta zaigu Musika Etxean, eta Kasinoan ere hezetasunen afera dago".

Forjazko elementuak konpondu dituzte
Horrez gain, une honetan parkean egiten ari den egitasmo baten berri eman du Aldundiak: forjazko elementuak berritzea.

30.000 euro baliatu dituzte horretarako. Gonzalezek azaldu duenez, hasieran ez zuten hori egiteko asmorik, "baina Kasinoa zaharberritzen ari ginela, ohartu ginen metalezko elementu horiek oso egoera kaskarrean zeudela". Beltzez margotu dituzte, oxidoaren aurkako tratamendua eta beste babesle batzuk aplikatzearekin batera, "ahalik eta luzaroen iraun dezaten egoera onean".

Cristina Gonzalezek nabarmendu du Aldundiak 2,5 milioi euro inbertitu dituela azken hiru urteetan Lamuza Parkeko eraikinetan, eta aurreratu du legealdia amaitu baino lehen beste horrenbeste inbertitzeko asmoa dutela. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa