Laudioko Udalak jakinarazi du Latiorroko 24 zebrabide margotu berri dituela, Goikogane eta Arantzar kaleetan. Gainera, Landaluzen ere beste batean gauza bera egin dute, 10 eta 12 zenbakien artean. Granja Kiroldegiaren aurrean dagoen oinezkoen elementu horretan ere esku hartu du tokiko erakundeak. 5.800 euro gastatu ditu guztira.
Hurrengo urratsa izango da Latiorroko erdigunean 5 zebrabide gehiago margotzea eta Maestro Elorza eta Jose Matia kaleen artean beste 17 egitea.
Zebrabideen altuera jaistea
Sei zebrabide beheratuko ditu udalak laster. Horietako 5 izango dira Zumalakarregi 58, 48, 46 eta 25 zenbakietan daudenak. 29.000 euro balioko du lanak gauzatzeak eta Eusko Jaurlaritzaren diru-laguntza eskuratu dute, irisgarritasuna bermatzeko.
Horiek ez ezik, Hiru Kurutzetza 12 zenbakian dagoen zebrabidean ere ekingo diote horrelako obra egiteari. Edonola ere, udal langileen ardura izango da. 13.330 euro bideratuko dituzte guztira hori egikaritzeko.
Bidegorria
Zumalakarregi etorbidea zeharkatzen duen bidegorrian ere esku hartuko du tokiko erakundeak, espaloiak eta bizikleten bideak altuera bera izan dezaten. Aglomeratua aldatuko dute horretarako.
Jose Matia eta Maestro Elorza kaleetan lan gehiago
Bi kale horietan trafikoari eta oinezkoei eragingo dizkien hobekuntzak gauzatuko ditu udalak. Hasteko, piboteak ordezkatuko ditu, autoek hain erraz apurtu ez ditzaten. Horretarako material hobeak baliatuko dituzte.
Horrez gain, eraikinen atarietako sarrerak indartuko dituzte auzokideen segurtasuna bermatzeko. Zebrabideetan ere argi seinaleak jarriko dituzte ikusgarritasuna handiagoa izan dadin. Azkenik, karga eta deskargarako toki bat kenduko dute, bertan zegoen negozioak itxi baitu.