Igande goizak etxean atsedena hartzen egoteko izan ohi dira pertsona askorentzat. Baina datozen asteburuetan kaleaz gozatzeko beta ere egongo da, "La Familia Inventada" taldeak antolatutako bisita antzeztuei esker. Artziniegan, Amurrion eta Laudion ari dira egitasmoa garatzen.
“Oso ikuskizun ezberdinak egiten ditugu herri bakoitzean”, azaldu du proiektuaren bultzaileetako bat den Susana Saguer Batllek. Amurrioko bisitetako protagonista Celi chefa da. “Sukaldari ero bat da, munduan barrena zoriontasunaren bila dabilena”. Laudion Lamuza parkea hautatu dute agertoki gisa, “espazioa tokiko hainbat pertsonaiekin beteaz”. Artziniegako bisitan, aldiz, Erdi Aroan girotutako istorio bat antzezten dute, “Antzinako Azokan eginiko emanaldian oinarrituta”.
Artziniegan, Amurrion eta Laudion ari dira bisita antzeztuak egiten. Hainbat emanaldi eskainiko dituzte hemendik urte amaierara
Hain zuzen, Artziniegan sortu zen ekimena, iaz. “Bisita gidatuak egin genituen azaroko lau igandeetan”. Arrakasta handia izan zuen egitasmoak. “Hor sortu zen Aiarako Kuadrillarekin harremana, eta erakunde horrekin elkarlanean ari gara orain”. Saguerrek jakinarazi duenez, “kale antzerkiaren ispiritua berreskuratzea” ere dute helburu. “Jendea harritu eta ilusionatu nahi dugu, igande goiz ezberdin bat igarotzeko”
Abendura arte
Amurrion urriaren 21ean, azaroaren 25ean eta abenduaren 8an izango dira hurrengo zitak. Artziniegan azaroaren 11an eta abenduaren 7an egingo dituzte. Laudion, aldiz, hiru saio egingo dituzte hemendik urte bukaerara: urriaren 14an, azaroaren 18an eta abenduaren 9an.
Ordu eta erdiko iraupena dute hiru bisitek, eta 11:30ean hasiko dira. Herrietako turismo bulegoetan, kultur etxeetan edo www.basquemountains.com webgunean eman behar da izena. “Ahal bezain azkar inskribatzeko deia luzatu nahi dugu, oso toki gutxi geratzen dira eta”.