Elikagai bilketa egingo du asteburuan Nomeolvides elkarteak Laudion. Eroski eta Berriak supermerkatuetan egongo dira, Apdemaren eta La Milagrosako ikasleen laguntzarekin. “Iaz hasi ginen ikastetxeko gazteekin lanean, gure jardunagatik interesatu zirelako. Ordutik hona hainbat aldiz aritu gara batera”, adierazi dute Nomeolvideseko kideek.
Elkarteak aurten egiten duen bigarren bilketa izango da. Boluntarioak establezimenduen ordutegian egongo dira elikagaiak jasotzen. Nomeolvidesekoek nabarmendu dute herritar oro dagoela gonbidatua boluntario gisa lan egitera. “Jasotzen ditugun elikagai guztiak herriko bizilagunen artean banatuko ditugu”.
Bonoak salgai
Berrikuntza bat izango du asteburu honetako zitak: ”2, 3 eta 5 euroko bonoak jarriko ditugu salgai supermerkatuetako kutxetan, eta horien bidez azkar iraungitzen diren produktuak eskuratu ahalko ditugu, beharra dutenei emateko”.
Hauek dira pilatu nahi dituzten produktuak: esnea, olioa, lekaleak, pasta, arroza, arrain eta barazki kontserbak, galletak eta txokolatea. Garbiketa produktuak ere eskatuko dituzte: gelak, konpresak, fardelak, xanpua, hortzetako pasta eta hortz eskuilak, besteak beste.
Horrez gain, kontu-korrontea jarri dute Caja Rural de Navarra-n, ekarpen ekonomikoak jasotzeko: ES91 3008 0200 4533 5397 7717.
Beste hainbat ekimen ere egin ditu Nomeolvides elkarteak ia bost urteko ibilbidean. Ogi barra solidarioarena da horietako bat. “Udan egin genuen azkeneko aldiz eta 25 familiari 500 barra inguru eman ahal izan genizkien”, azaldu du elkarteko bozeramailea den Patxi Sanchezek.